इपिएलको उपाधि बिराटनगरलाई | फाइनलमा हजारौँ दर्शक उपस्थितिले सबै चकित

काठमाडौँ : टिभीएस एभरेस्ट प्रिमियर लिग अन्तर्गत फाइनल खेलमा भैरहवा ग्लाडीयटर्सलाई १ रनले पराजित गर्दै विराटनगर वारियर्सले उपाधि जितेको छ । खेलको पहिलो इनिङ सकिँदा विराटनगरले भैरहवालाई १५० रनको चुनौति दिएको थियो।  विराटनगरले प्रस्तुत गरेको १ सय ५० रनको लक्ष्य भैरहवाले प्राप्त गर्न सकेन।

भैरहवाका लागि कप्तान शरद भेषावकरले अर्धशतक बनाउँदै ५२ रनको पारी खेले।ओपनर प्रथम सालुन्केले ३० र आरिफ शेखले २७ रनको योगदान दिए। विराटनगरका अंशुमन रथले एकै ओभरमा ३६ रन खाएपछि टोली दबाबमा पारेको थियो। विराटनगरका लागि अनिल साहले ३, करण केसीले २ तथा कप्तान पारस खड्काले १ विकेट लिए। अन्तिम ओभरमा ९ रन आवश्यक परेकोमा भैरहवाले ३ विकेट गुमाउँदै ७ रन मात्र जोडेको थियो। त्यसअघि टस जितेर पहिलो ब्याटिङ रोजेको विराटनगरले २० ओभरमा ७ विकेट गुमाउँदै १ सय ४९ रनको योगफल खडा गरेको थियो।

टोलीका लागि अंशुमन रथले सर्वाधिक ४१ रनको योगदान दिए। पारस खड्काले २७ तथा अनिल कुमार साहले २२ रन जोडे। भैरहवाका कृष्ण कार्की र भुवन कार्कीले २-२ विकेट लिए। यो प्रतियोगितामा पारस खड्काको टिम विराटनगरसँग शरद भेषावकरको भैरहवाको तेस्रो हार हो । भैरहवा समूह चरण र पहिलो क्वालिफायरमा हारेको थियो ।
फाईनल खेलमा हजारौँ दर्शकहरु उपस्थित भएका थिए। घरेलु लिग क्रिकेटमा यति धेरै दर्शकहरु उपस्थित भएको यो पहिलो पटक हो। यसले नेपालमा क्रिकेट क्रेजबारे सँसारलाई नै चकित पारेको छ।